काठमाडौं । सामाजिक सञ्जालमा युवतीलाई साथी बनाएर चरित्र हत्या गरेको आरोपमा प्रहरी जवान पक्राउ परेका छन् । नेपाल प्रहरीको साइबर ब्युरोले रौतहटको दुर्गा भवानीपुर गाउँपालिकास्थित प्रहरी चौकी बटेश्वरमा कार्यरत् प्रहरी जवान कृष्णकुमार यादवलाई पक्राउ गरेको हो ।

युवतीलाई म्यासेज, च्याट, भिडिओ कल गर्ने र सोही क्रममा प्रलोभनमा पारी तस्बिर खिच्ने गरेको आरोप उनलाई लागेको थियो । त्यसरी खिचेका तस्बिर ह्वाट्सएप, फेसबुक लगायतमा पोष्ट गर्ने, धाकधम्की दिई पीडितलाई मानसिक तनाव, हैरानी, बदनाम र बेइज्जत गरेपछि प्रहरीले यादवलाई पक्राउ गरेको हो ।

पक्राउ परेका यादवलाई विद्युतीय कारोबार ऐन २०६३ अनुसार थुनामा राखी अनुसन्धान थालिएको नेपाल प्रहरी साइबर ब्युरोका प्रवक्ता एसएसपी नविन्द अर्यालले जानकारी दिए ।