काठमाडौँ । नेकपा एमालेका अध्यक्ष केपी शर्मा ओलीले बजेटमाथि भण्डाफोर गर्न पार्टीका सांसदहरूलाई निर्देशन दिएका छन् । सरकारले अनुचित ढंगले आगामी आर्थिक वर्षको बजेट ल्याएको टिप्पणी गर्दै उनले जनताको बीचमा भण्डाफोर गरेर लैजान पार्टीका सांसदलाई निर्देशन दिएका हुन् ।

सोमबार बसेको पार्टी संसदीय दलको बैठकमा अध्यक्ष ओलीले सरकारमाथि बजेट अनुचित, बिना सिद्धान्त र प्राथमिकताका आधारमा ल्याएको आरोप लगाउँदै भण्डाफोर हुने गरी जनताको बीचमा जान सांसदलाई निर्देशन दिएका हुन् ।

‘अध्यक्षले बजेट अनुचित ढंगले आएको, सिद्धान्तहीन र प्राथमिकताविहीन ढंगले आएकाले त्यसलाई भण्डाफोर गर्न पार्टीका सांसदलाई निर्देशन दिनु भएको छ,’ प्रमुख सचेतक भट्टराईले भने ।

एमालेले सरकारले ल्याएको बजेट चुनावमा भोट माग्ने गरी आएको आरोप लगाउँदै मुलुकको अर्थतन्त्रको यथार्थलाई सम्बोधन गर्न नसकेको आरोप लगाएको छ ।

संसद भवन नयाँ बानेश्वरमा बसेको बैठकमा अध्यक्ष ओली, पूर्वअर्थमन्त्रीहरू विष्णु पौडेल, सुरेन्द्र पाण्डे, युवराज खतिवडाले बजेटबारे सांसदलाई प्रशिक्षण दिएका थिए ।