काठमाडौँ । मुस्ताङको थासाङ गाउँपालिका २ सानोसरेमा आइतबार भएको तारा एयरको विमान दुर्घटनामा परी ज्यान गुमाएका सबैको शव काठमाडौं ल्याइएको छ ।

मंगलबार थप १२ जनाको शव काठमाडौं ल्याइएको हो । गत आइतबार पोखराबाट जोमसोमका लागि उडेको तीन चालक दल सदस्य र १९ जना यात्रु सवार तारा एयरको ‘टुवीन अटर नाइन एन–एइटी’ विमान सोमबार बिहान मुस्ताङको सानोसरेमा दुर्घटनाग्रस्त अवस्थामा फेला परेको थियो ।

सोमबार नै १० जनाको शव काठमाडौं ल्याइएको थियो । बाँकी १२ जनाको शव मंगलबार ल्याइएको हो । शव पोष्टमार्टमका लागि त्रिवि शिक्षण अस्पतालस्थित फरेन्सिक मेडिसिन विभागमा लगिएको छ ।