काठमाडौँ । मधेस प्रदेश सरकारले आगामी आर्थिक वर्षका लागि नीति तथा कार्यक्रम ल्याएको छ । नीति तथा कार्यक्रममा प्रदेश सरकारले कक्षा १२ अध्ययन गर्ने छात्रालाई ल्यापटप प्रदान गर्ने भएको छ ।

यस्तै, कक्षा ८ मा अध्ययन गर्ने छात्रालाई साइकल वितरण गर्ने नीति तथा कार्यक्रममा उल्लेख गरिएको छ । प्रदेशसभा आइतबार प्रदेश प्रमुख हरिशंकर मिश्रले नीति तथा कार्यक्रम प्रस्तुत गरेका थिए ।

उनले ‘बेटी पढाऔँ,​ बेटी बचाऔँ’ अभियानअन्तर्गत सामुदायिक विद्यालयमा कक्षा ८ मा अध्ययनरत छोरीलाई साइकल र कक्षा १२ अध्ययन गर्ने छात्रालाई ल्यापटप दिने बताएका थिए ।

नीति तथा कार्यक्रममा मधेस प्रदेश सरकारले सुशासन, विकास, कृषि, स्वास्थ्यलाई विशेष प्राथमिकता दिएको छ । मधेस सरकारले ल्याएको नीति तथा कार्यक्रममा प्रदेशको प्रत्येक जिल्लामा विकास निर्माणलाई तीव्रता दिन हरेक जिल्लामा प्रादेशिक नमुना परियोजना बनाउने भएको छ ।