काठमाडौँ । शनिबार रातिदेखि लागु हुने गरी नेपाल विद्युत प्राधिकरणले कालीगण्डकी ए जलविद्युत आयोजनाको १३८.८ मेगावाट विद्युत भारतलाई बिक्री गर्न थालेको छ । यस्तै, देवीघाट जलविद्ययुत केन्द्रबाट १४.३१ मेगावाट, त्रिशुली जलविद्युत आयोजनाबाट २३.४ मेगावाट बिजुली निर्यात हुँदै आएको थियो ।

वर्षायाम लागेसँगै नेपालमा विद्युत उत्पादन बढी भएपछि प्राधिकरणले भारतलाई विद्युत बिक्री गरेको हो । विद्युत बिक्रबाट प्राधिकरण दैनिक ५ करोड रुपैयाँसम्म आम्दानी गर्न थालेको छ ।

सोमबार एकैदिन नेपालले भारतलाई ४२ लाख २७ हजार एक सय युनिट विद्युत निर्यात गर्ने भएको छ । प्रतियुनिट अधिकतम् १२ भारु अर्थात् १९.२ रुपैयाँमा भारतलाई विद्युत निर्यात गर्ने भएको छ ।

भारतको प्रतिस्पर्धी ऊर्जा बजारमा नेपाली बिजुली न्युनतम् ४.७८ रुपैयाँ र अधिकतम १९.२ रुपैयाँमा बिक्री गर्ने सर्त राखिएको छ । औसतमा भन्दा प्रतियुनिट १२.८४ नेपाली रुपैयाँ हुन आउँछ ।

प्राधिकरणले रातको समयमा खपत हुन नसकेको बिजुली भारत पठाएको हो । तर, भारतमा रातको समयमा सोलार प्लान्टबाट बिजुली नआउने र गर्मी भएकाले बढी विद्युत खपत हुने गरेको छ ।

विद्युत बेचेर प्राधिकरणले एकैदिन सोमबार ५ करोड १२ लाख रुपैयाँभन्दा बढी आम्दानी गर्न भएको छ । भारतले नेपाललाई दिएको अनुमतिअनुसार वर्षयाममा प्राधिकरणले एकै दिन १० करोडभन्दा बढी मूल्यको विद्युत बेच्न सक्ने छ ।