काठमाडौँ । प्रतिनिधिसभाले किसानलाई रासायनिक मल उपलब्ध गराउन निर्देशन दिएको छ । प्रतिनिधिसभाले सम्भाव्य सबै उपाय अवलम्बन गरेर भए पनि मल उपलब्ध गराउन सरकारलाई निर्देशन दिएको हो ।

सोमबार बसेको प्रतिनिधिसभा बैठकमा नेकपा एमालेका सांसद विशाल भट्टराईले पेश गरेको रासायनिक मलसम्बन्धी जरुरी सार्वजनिक महत्वको प्रस्तावमाथिको छलफलपछि सरकारलाई यस्तो निर्देशन दिएको छ ।

‘कूल ग्रार्हस्थ उत्पादनमा २५ प्रतिशत योगदान दिने कृषि क्षेत्रको समस्या समधान गर्न प्राथमिकता दिँदै कृषि उत्पादन वृद्धि गर्न आवश्यक रासायनिक मल कृषकलाई सहज रुपमा उपलब्ध गराउन सम्भाव्य सबै उपाय अवलम्बन गरी कार्य सम्पादन गर्न प्रतिनिधिसभाको यो बैठक नेपाल सरकारलाई निर्देश गर्दछ’ छलफलपछि प्रतिनिधिसभाले पारित गरेको प्रस्तावमा भनिएको छ ।

यो प्रस्तावलाई प्रतिनिधिसभाले सर्वसम्मतिले पारित गरेको छ ।