काठमाडौँ । अर्थमन्त्रीबाट राजीनामा दिएसँगै नेकपा माओवादी केन्द्रका नेता जनार्दन शर्माले बजेट कार्यान्वयन भए माओवादीले २७० स्थानमा जित्ने दाबी गरेका छन् ।

माओवादीको महाधिवेशनले निर्देशित गरेबमोजिम समाजवादी क्रान्तिको आधार तय गर्न ल्याइएको बजेट ध्वस्त पार्न आफूलाई राजीनामा गराउन बाध्य बनाएको उनको दाबी थियो ।

पार्टीको जारी केन्द्रीय कमिटीको बैठकमा बिहीबार सम्बोधन गर्दै शर्मा भने, ‘अध्यक्ष कमरेडले १७० भन्नु हुन्थ्यो, म भन्छु यो बजेट कार्यान्वयन भयो भने २७० आउँछ, संसदमा हिजो पनि जुन ढंगले अट्याक भयो, त्यसमा हाम्रो अगाडि लिडरशीपको रोबाट उठेर ठाउँको ठाउँ प्रतिवाद गर्नु पर्थ्यो, सभामुखले पनि समय दिनु भएन हाम्रा साथीहरुलाई, सभामुखले समय दिनु पर्थ्यो ।’