काठमडौं । राष्ट्रिय प्रजातन्त्र पार्टी (राप्रपा) ले पार्टीको नाम दुरूपयोग गर्दै छुट्टै भेला गरेको भन्दै चार जना नेतालाई स्पष्टीकरण सोध्ने भएको छ। बुधबार केन्द्रीय कार्यालय धुम्बाराहीमा बसेको केन्द्रीय कार्य सम्पादन समिति बैठकले चार जना नेताहरूसँग स्पष्टीकरण सोध्ने निर्णय गरेको हो।

पार्टी प्रवक्ता मोहनकुमार श्रेष्ठले एक विज्ञप्ति जारी गर्दै चार जना नेताहरूलाई स्पष्टीकरण सोध्ने निर्णय गरिएको जानकारी दिएका हुन्।

विज्ञप्तिका अनुसार दिलनाथ गिरी, दिलविकास राजभण्डारी, श्यामप्रसाद तिमल्सिना र राजाराम श्रेष्ठलाई स्पष्टीकरण सोध्ने निर्णय भएको हो।

राप्रपाको एकतामा आँच आउने गरी केही व्यक्तिहरूले पार्टीको नामको दुरूपयोग गरी भेला गरेको हुँदा अनुशासनहीन गतिविधि गर्नेलाई कुनै हालतमा छुट नहुने पार्टीले बताएको छ।

‘पार्टीको हित विपरीतका गतिविधि जारी राख्ने, अनधिकृत वार्ता समिति बनाउने र सञ्चारमाध्यममा जथाभावी समाचार प्रकाशन, प्रसारण गर्ने, गराउने कार्यमा संलग्न भएकालाई २४ घन्टाभित्र लिखित स्पष्टीकरण सोध्ने र अनुशासन समितिलाई कारबाहीका लागि सिफारिस गर्ने निर्णय गरिएको छ,’ प्रवक्ता श्रेष्ठले जारी गरेको विज्ञप्तिमा भनिएको छ।

यस्तै राप्रपा पार्टीको नेतृत्व पंक्ति पूर्ण रूपले एकताबद्ध रहेको समेत प्रस्ट्याएको छ। राप्रपाका महामन्त्रीद्वय कुन्तिकुमारी शाही र राजेन्द्र गुरूङको नाम जोडेर सामाजिक सञ्जालमा चरित्र हत्या गरी समाचारहरू लेखिएको भन्दै राप्रपाले पनि आपत्ति जनाएको छ।