काठमाडौँ । नेपाली सेनाले ४३ वर्षदेखि आफ्ना हेलिकोप्टर र जहाज भाडामा लगाउँदा लागेको भाडा उठाउन नसक्ने भएको छ ।

प्रत्येक वर्ष यस्तो रकम थपिदै जाँदा सेनाले हेलिकोप्टर तथा जहाज चार्टर गरेबापत उठाउन बाँकी रकम अहिले एक करोड ८९ लाख ५४ हजार रुपैयाँ पुगेको छ ।

महालेखा परीक्षकको कार्यालयले गत साता सार्वजनिक गरेको ५९ औँ वार्षिक प्रतिवेदनमा आर्थिक वर्ष २०३४-३५ देखि २०७७-७८ सम्म सेनाले उठाउन बाँकी चार्टर भाडा एक करोड ८९ लाख रुपैयाँ पुगेको उल्लेख गरिएको छ ।

‘विवरणअनुसार ८ निकायबाट आर्थिक वर्ष २०७७-७८ को चार्टर भाडा ७१ लाख १९ हजार र २०३४-३५ देखि २०७६-७७ सम्मको १ करोड १८ लाख ३५ हजार रुपैयाँ समेत एक करोड ८९ लाख ५४ हजार रुपैयाँ उठ्न बाँकी रहेको छ, बक्यौता रकम समितिको कार्य विधिअनुसार असुल गर्नु पर्दछ,’ महालेखाले आफ्नो प्रतिवेदनमा भनेको छ ।

नेपाली सेनामा रहेको सैनिक विमान चार्टर उडान समितिले सैनिक विमान भाडामा दिने काम गर्छ । समिति मातहतमा रहेका १७ जहाजमध्ये एउटा मर्मतका लागि रहेको र ६ वटा सेवा दिन नसक्ने अवस्थामा छन् ।

आर्थिक वर्ष २०७७-७८ मा सेनाको १० वटा जहाजले २४१ घण्टा उडान गरेको थियो । सेनाले हवाइ साधनबाट आर्थिक वर्ष २०७६-७७ मा १९ करोड ३३ लाख ६९ हजार आम्दानी गरेको थियो । आर्थिक वर्ष २०७७-७८ मा यो रकम १६ करोड ४४ लाख ६४ हजार रुपैयाँ रहेको थियो ।