काठमाडौँ । पोखरामा महानगरका मेयरहरूको सम्मेलन हुने भएको छ । साउन १३ र १४ गते पोखरा महानगरको आयोजनामा मेयर सम्मेलन हुन लागेको हो ।

महानगर सञ्चालनका विद्यमान कानुन र आवश्यक सुधारबारे छलफल गर्न तथा अनुभव आदान प्रदान गर्न कार्यक्रम राखिएको पोखराका मेयर धनराज आचार्यले बताए ।

उनका अनुसार गाउँपालिका र नगरपालिकाका समस्या सुनाउन आफ्नै संरचना भए पनि महानगरको छुट्टै संरचना नभएकाले भेलाले साझा समस्या खोजेर समाधान गर्न सम्बन्धित निकायमा सुझाव दिने छ ।

यसअघि पोखराकै आयोजनामा मेयर सम्मेलन भएको थियो । सम्मेलनमा महानगरको सञ्चालन कानुन फरक हुनु पर्ने आवाज उठे पनि कार्यान्वयनमा गएन ।

यसपालि महानगरको छुट्टै सञ्चालन ऐन निर्माणका लागि छलफल हुन सक्ने बताइएको छ । ‘धेरै चुनौती छन्, ती चुनौती पार लाउन आपसी भेटघाट र छलफल हुनु पर्छ,’ आचार्यले भने, ‘एउटा प्रक्रियाको सुरुवात मात्रै हो, यसपछि निरन्तर बैठक हुने छ ।’

आचार्यले १ महिनाअघि मेयर सम्मेलनका लागि निम्तो गरेका थिए । सबै महानगरका मेयरसँग छलफल गरेर भेला आयोजना गरिएको उनले बताए ।

६ वटा महानगरमध्ये ललितपुर र भरतपुरमा पुरानै मेयर छन् भने बाँकी सबै महानगरमा नयाँ मेयर निर्वाचित भएका छन् । पुराना मेयरको अनुभव सुनेर नयाँ मेयरले कामको कार्य योजना बनाउन सजिलो हुने पोखरा महानगरले जनाएको छ ।