काठमाडौं । मंकीपक्स भाइरस भएरनभएको परीक्षण नेपालमा हुने भएको छ । राष्ट्रिय जनस्वास्थ्य प्रयोगशाला टेकुमा मंकीपक्सको परीक्षण हुने भएको हो ।

विश्व स्वास्थ्य संगठन डब्लूएचओले मंकीपक्स परीक्षण गर्ने २५० वटा किट नेपाललाई दिएको छ ।
‘शंकास्पद रहेकाको परीक्षण गर्छौं । डब्लूएचओको सहयोगमा किट आएको हो,’ प्रयोगशालाकी निर्देशक डा. रुना झाले भनिन् । उनका अनुसार हालसम्म नेपालमा मंकीपक्स पुष्टि भएको छैन ।

छिमेकी देश भारतमा मंकीपक्सका बिरामी भेटिएका छन् । सीमा नाकाबाट नेपाल आउन सक्ने भन्दै सरकारले सतर्कता बढाएको जनाएको छ । मंकीपक्स हेर्न १४ वटा अस्पतालमा फोकल पर्सन तोकिएको छ ।

डब्लूएचओका अनुसार हालसम्म ७७ वटा देशमा मंकीपक्स फैलिएको छ । हालसम्म विश्वभर १६ हजार बढी मानिस संक्रमित भएका छन् भने पाँच जनाको मृत्यु भएको छ । यो भाइरस बाँदर र मुसाबाट सर्छ ।