काठमाडौँ । बैतडीमा दाइले बुबाको हत्या गरेपछि एक किशोरीको बिचल्ली भएको छ । डिलाशैनी गाउँपालिका ५ सेराका २४ वर्षीय लोकेन्द्र जोशीले शुक्रबार बिहान ५ बजे आफ्नै ६८ वर्षीय बुबा अन्तराम जोशीको बञ्चरो प्रहार गरी हत्या गरेका हुन् ।

बुबाको हत्या गरेका दाइ जेल जाने निश्चित भएसँगै १७ वर्षीया किशोरी रमिता बिचल्लीमा परेकी हुन् । रमिताकी आमाको १३ वर्षअघि नै मृत्यु भएको थियो ।

‘म चार वर्षकी छँदा आमाको मृत्यु भयो । बुवा, दाइ र म मात्र बस्थ्यौँ । अहिले दाइले नै बुबाको हत्या गरेपछि म एक्ली भएँ । मेरो कोही छैन,’ रमिताले भनिन् ।

चुहिने छानो भएको एक कोठाको घरमा बस्ने रमिताले अहिले कक्षा १२ को परीक्षा दिएकी छन् । उनको गाउँकै सबैभन्दा विपन्न परिवारमा पर्छ ।

लोकेन्द्रलाई डिलाशैनी गाउँपालिका अध्यक्ष सन्तोष जोशीका बुबा प्रदीपले लघु उद्यम सहजकर्ताको १८ महिने कोर्ष गराउन आर्थिक सहयोग गरेका थिए । तर, उनले उक्त कोर्ष पास गर्न सकेनन् ।

‘इडीएफ कोर्षमा पनि फेल भएको दाइले एसईई पनि पास गर्न सकेका थिएनन् । दुई वर्ष भारत गएर ९ हजार रुपयाँ मात्रै पठाए, त्यो पैसाले गाई किन्यौँ । त्यसबाहेक दाइको कमाई नै थिएन,’ रमिताले भनिन्, ‘हाम्रो सहारा बुवा मात्रै हुनु हुन्थ्यो । बुबालाई पनि दाइले हत्या गर्नु भयो । म एक्लै भएँ, अब म के गरौँ ? कहाँ जाउँ ? मेरो सहारा कोही छैन ।’

लोकेन्द्र भन्छन् : पछुतो छैन

अन्तराम बिहानै उठेर आँगनमा मोही पार्ने पारो धोइरहेका थिए । यसैबेला बञ्चरोसहित ढोकाबाट बाहिर निस्केका छोरा लोकेन्द्रले बुबामाथि प्रहार गरे ।

पहिलो चोट लागेपछि पानी खोज्न गएका अन्तरामलाई पाँचपटक बञ्चरो प्रहार गरे लोकेन्द्रले । लोकेन्द्रको बञ्चरो प्रहारबाट अन्तरामको मृत्यु भयो ।

बुवाको हत्यापछि लोकेन्द्र धारातर्फ गएका थिए । धारामा भेटिएका गाउँलेलाई आफूले बुबाको हत्या गरेको बताए । त्यसपछि गाउँलेले प्रहरीलाई खबर गरे ।

‘मैले केही समय अघिदेखि नै मार्ने योजना बनाएको हुँ । आज मात्रै मौका मिल्यो । मेरो नजरमा चारजना अरु पनि छन् । मैले घटना स्वीकार गरिसकेकाले एक वर्ष पनि जेल बस्दिन होला । मेरो खानामा थुक्ने, मलाई गाली गर्ने भएकाले बुबा मारेको हुँ,’ लोकेन्द्रले भने ।

‘आफू मृतक अन्तरामको छोरासमेत नभएको लोकेन्द्र बताउँछन् । ‘मलाई उसले (अन्तराम) पालेको मात्रै हो । म उसको छोरा नै होइन,’ उनले भने । यसअघि नै १०-१२ पटक बुबाको हत्या गर्न खोजेको उनको भनाइ छ ।

लोकेन्द्रले अन्तराम आफ्नो बुबा नभएको बताए पनि उनी छोरा भएको आफन्त बताउँछन् । स्थानीयबासीका अनुसार मृतकका दुई छोरी र एक छोरा छन् । जेठी छोरी राजमतीको विवाह भइसकेको छ । कान्छी छोरी रमिता अविवाहित छिन् । राजमतीको घर महेन्द्रनगरमा छ ।

बुबाको हत्या गर्नु केही दिन अघिदेखि लोकेन्द्र कसैसँग नबोल्ने गरेको स्थानीयबासीको भनाइ छ । हत्याका अभियुक्तलाई कानुनअनुसार कारबाही हुने जिल्ला प्रहरी कार्यालय बैतडीका प्रवक्ता लोकराज जोशीले बताए ।

डिलाशैनी गाउँपालिकाभरिका टुहुरा बालबालिकाका लागि नीति निर्माण गरी टुहुरा बालबालिका लक्षित कार्यक्रम ल्याउने गाउँपालिका अध्यक्ष सन्तोश जोशीले बताए ।