काठमाडौँ । नेकपा एमालेका अध्यक्ष केपी शर्मा ओलीले संसदीय विशेष समितिको प्रतिवेदन मान्य नहुने बताएका छन् । उनले पूर्व अर्थमन्त्री जनार्दन शर्मामाथि छानबिन गर्न गठित समितिको प्रतिवेदनलाई मान्य नहुने बताएका हुन् ।

शनिबार राष्ट्रिय युवा संघले गरेको एक कार्यक्रममा बहुमत र अल्पमतका आधारमा प्रतिवेदन ल्याइएको भन्दै उनले संसदीय समितिको प्रतिवेदन मान्न नसकिने बताए । आर्थिक वर्ष २०७९–०८० को बजेट निर्माणमा अनधिकृत व्यक्तिको प्रवेश गरी करको दर हेरफेर गरेको भन्दै छानबिन गर्न गठित ११ सदस्यीय संसदीय टोलीले प्रतिवेदन बुझाएको थियो ।

समितिमा एमालेका चार जना र बाँकी नेपाली कांग्रेस, नेकपा माओवादी केन्द्र, नेकपा एकीकृत समाजवादी, जनता समाजवादी पार्टी र लोकतान्त्रिक समाजवादी पार्टीका सांसद थिए । ‘११ जनाको समिति बनाउने, ७ जना आफ्ना राख्ने, हुन्छ हुन्न भनेर रिपोर्ट ल्याउने ?,’ उनले भने, ‘यो तथ्यमा आधारित रिपोर्ट होइन, त्यसलाई मान्न सक्ने कुरा हुन्न, नेपाली जनताले अस्वीकार गर्नु पर्छ ।’