काठमाडौँ । अर्थमन्त्रीको सपथ लिएसँगै जनार्दन शर्माले पदभार ग्रहण गरेका छन् । आइतबार साँझ राष्ट्रपति कार्यालयमा शपथ ग्रहणपछि शर्मा अर्थमन्त्रालय पुगेका थिए ।

मन्त्री शर्मालाई राजस्व सचिव कृष्णहरि पुष्करले स्वागत गरेका थिए । अर्थ मन्त्रालयका सचिव मधु मरासिनी अनुपस्थित भएका थिए ।

आर्थिक वर्ष २०७९–८० को बजेट निर्माण गर्दा अनधिकृत व्यक्ति प्रवेश गराएर करको दर हेरफेर गरेको आरोपसँगै उनले असार २२ गते राजीनामा दिएका थिए । सोही दिन उनीमाथि छानबिन गर्न संसदीय समिति गठन भएको थियो ।

संसदीय समितिले बजेट निर्माणमा अनधिकृत व्यक्तिको प्रवेश गरेको पुष्टि गर्न नसकेपछि उनी पुनः अर्थमन्त्री नियुक्ति भएका हुन् । समितिले प्रतिवेदन दिएको दुई दिनपछि प्रधानमन्त्री शेरबहादुर देउवाले शर्मालाई नै अर्थमन्त्री बनाएको हो ।