काठमाडौँ । गृहमन्त्री बालकृष्ण खाँणले काठमाडौँको काभ्रेस्थलीमा एकै परिवारका चार जनाको मृत्यु भएको घटनाबारे जानकारी लिएर घटनाबारे अनुसन्धान गरी सत्य तथ्य पत्ता लगाउन निर्देशन दिएका छन् ।

यस्तै, कास्की, प्यूठान र पाल्पामा निरन्तरको वर्षापछि गएको पहिरोले पुर्याएको क्षति र तत्कालका लागि आवश्यक पर्ने राहत तथा जोखिममा रहेका नागरिकलाई सुरक्षित स्थानमा पुर्याउन भइरहेका पहलबारे जानकारी लिएका छन् ।

गृहमन्त्री खाँणले लुम्बिनी प्रदेश प्रहरी प्रमुख नायब महानिरीक्षक नलप्रसाद उपाध्याय, सशस्त्र प्रहरीका लुम्बिनी प्रदेश प्रमुख सशस्त्र प्रहरी नायब महानिरीक्षक कुलबहादुर नेम्वाङ, कास्कीका प्रमुख जिल्ला अधिकारी जयनारायण आचार्यसँग पहिरोबाट गएको क्षति र तत्कालका लागि राहत तथा नागरिकलाई सुरक्षित स्थानमा पुर्याउन गरिएको पहलबारे जानकारी लिए ।

उनले उद्धार र राहतमा थप सहयोग आवश्यक पर्ने भए मन्त्रालयमा जानकारी गराउनसमेत आग्रह गरेका छन् । काठमाडौँका प्रमुख जिल्ला अधिकारी गोविन्द रिजालसँग काभ्रेस्थलीमा एकै परिवारमा चार जना मृत फेला परेको अवस्थाबारे जानकारी लिए ।

प्युठानको जुम्रिमा तथा बुटवल–पाल्पा पर्ने सिद्धार्थ राजमार्गमा गएको पहिरो हटाएर सडक सुरु गर्ने विषयमा उनले नेपाल प्रहरीका लुम्बिनी प्रदेश प्रमुख डीआईजी उपाध्याय र सशस्त्रका लुम्बिनी प्रदेश प्रमुख नेम्वाङसँग जानकारी लिए । प्रहरी, सशस्त्र र स्थानीयको पहलमा अहिले पहिरो हटाएर सडक सुरु गराउने काम भइरहेको डीआइजी उपाध्यायले बताए ।

यता कास्कीको पोखरा महानगरा १६ डिहिगोपाटनमा अवस्थित लक्ष्मी खड्काको ब्लकले बनाएको घर पुरिँदा कोठा भाडामा बस्दै आएका माछापुच्छ्रे गाउँपालिका १ का तातोपानीका २६ वर्षीय सन्तोष सुनारको मृत्यु भएको र घाइते भएकाहरूबारे प्रजिअ आचार्यसँग गृहमन्त्री खाँणले जानकारी लिए । घर पुरिएका सन्तोषकी दिदी सुनिता सुनार घाइते भएकी छन् । घाइते सुनिताको गण्डकी अस्पतालमा उपचार भइरहेको छ । उनको अवस्था सामान्य रहेको प्रजिअ आचार्यले बताए ।

कास्कीमा परेको निरन्तरको वर्षाले पोखरा १३ कमलपोखरीमा घरहरू डुबानमा परेका छन् । घर डुबानमा परे पनि मानवीय क्षति भएको छैन । डुबानमा परेका घरका बासिन्दालाई सुरक्षित स्थानमा सारिएको कास्की प्रशासनले जनाएको छ ।