काठमाडौँ । दुई दिनपहिले भारतको दक्षिणी राज्य केरलामा मृत्यु भएका एक युवकलाई मंकीपक्स संक्रमण पुष्टि भएको छ । हालै संयुक्त अरब इमिरेट्स (युएई)बाट केरला आएका २२ वर्षीय युवकको शनिबार मृत्यु भएको हो ।

उनको मृत्युपछि परीक्षण गरिएको नमुनामा भाइरस भेटिएको केरलाका स्वास्थ्य मन्त्री वीणा जर्जले पुष्टि गरेका हुन् । मंकीपक्स संक्रमिण पुष्टि भएका मृतक युवकको सम्पर्कमा आएका २० जनालाई ‘उच्च जोखिम’को रूपमा वर्गीकृत गरी चिकित्सकको निगरानीमा राखिएको छ ।

केरलामा भाइरस संक्रमणबाट मानिसको मृत्यु भएपछि राज्य सरकारले उनको मेडिकल रिपोर्ट जाँच गर्न उच्च स्तरीय समिति गठन गरेको जनाएको छ ।

विश्वका विभिन्न देशमा मंकीपक्स भाइरस फैलिएपछि विश्व स्वास्थ्य संगठन (डब्ल्यूएचओ)ले गत महिना मंकीपक्स भारइरसको प्रकोपलाई विश्वव्यापी स्वास्थ्य संकटका रूपमा घोषणा गरेको थियो ।