काठमाडौँ । भारतमा जारी साफ यू-२० च्याम्पियनसिपबाट नेपाल बाहिरिएको छ । नेपालले बंगलादेशविरुद्ध १-१ गोलको बराबरी खेले पनि फाइन पुग्ने सम्भावना कायम थियो ।

नेपाल फाइनल पुग्न माल्दिभ्ससँग भारत पराजित हुनु पर्ने थियो । तर, खेलमा भारत १-० ले विजयी भएसँगै नेपाल बाहिरिएको हो ।

खेलको अन्तिम ८९ औँ मिनेटमा भारतका गुर्किरत सिंहले गोल गरेका थिए । योसँगै भारतले बंगलादेशसँग फाइनल खेल्ने भएको छ ।

आजै भएको खेलमा नेपालका लागि निरञ्जन मल्लले खेलको ६८ औँ मिनेटमा सानदार गोल गरेका थिए । सब्स्टिच्युट खेलाडीका रुपमा उनी मैदानमा गएका थिए । बंगलादेशका लागि अहमेद नोभाले खेलको ६३ औँ मिनेटमा गोल गरेका थिए ।

नेपालसँग बराबरी खेलेको बंगलादेश चार खेलबाट १० अंक जोड्दै लिगको शीर्ष स्थानमा रहेको छ । नेपालको चार खेलमा दुई जित र एक बराबरीबाट ७ अंक जोड्दै बाहिरिएको हो ।

यसअघि नेपालले माल्दिभ्सलाई ४-० गोल अन्तर र श्रीलंकालाई ३-० गोलले पराजित गरेको थियो । यस्तै, तेस्रो खेलमा भारतसँग ८-० गोलले पराजित भएको थियो ।