काठमाडौँ । नेकपा माओवादी केन्द्रका सांसद हरिबोल गजुरेलले प्रमुख प्रतिपक्ष दल नेकपा एमालेले प्रधानन्यायाधीश चोलेन्द्र शमशेर जबरालाई जोगाउन लागेको बताएका छन् ।

आइतबार प्रतिनिधिसभा बैठकमा प्रधानन्यायाधीश जबराविरुद्धको महाभियोग प्रस्तावमाथि छलफलमा बोल्दै सांसद गजुरेलले एमाले
प्रधानन्यायाधीशलाई जोगाउन लागेको बताएका हुन् । उनले महाभियोग पारित गर्न दुई तिहाई चाहिने र त्यसको निम्ति प्रतिपक्षको सहयोग आवश्यक पर्ने उल्लेख गर्दै प्रतिपक्ष दल पारित गराउन नलागेको दाबी गरे ।

उनले प्रतिपक्षले जबरालाई जोगाउने गरी बोल्दा जनताको नजरबाट गिर्ने डरले जिब्रो चपाएर कुरा गरेको बताए । ‘सत्तापक्ष, प्रतिपक्ष सबै एक ठाउँमा आएर यसलाई छिटोभन्दा छिटो गरुँ भन्नेमा सहमति दिनु पर्ने ठाउँमा, दुई तिहाई नभइ त यो पारित हुँदैन,’ उनले भने, ‘प्रतिपक्ष त अगाडि आउनुपर्यो नि, तपाईंहरु अगाडि बढ्नुस हामी छौँ भने ।’

उनले महाअभियोगको विषयमा सत्तापक्ष र प्रतिपक्ष एकै ठाउँमा उभिन नसक्नु दुःखद् भएको बताए ।