काठमाडौँ। चार वर्षअघि कञ्चनपुरकी १३ वर्षीय निर्मला पन्तको बलात्कारपछि हत्या भएको थियो । सो घटना कसले गर्यो भनेर अझै प्रहरीले पत्ता लगाउन सकेको छैन ।

प्रहरीले घटनामा संलग्न भएको भन्दै ४४ वर्षीय दिलिप सिंह विष्टलाई प्रहरीले क्लोज वाच गरेका थिए । तर चौतर्फी विरोध र डीएनए नमिलेपछि उनले उन्मुक्ति पाएका थिए ।

तिनै दिलिपसिंह विष्टविरुद्ध पुनःउजुरी परेको छ । निर्मला पन्तको घटनामा साइकल भेटिएको ठाउँ नजिकैको सडक छेउमा अर्की एक किशोरीलाई दुर्व्यवहार गरेको उजुरी प्रहरीमा पुगेको हो ।

दिलिपले बाटोमा हिँड्ने किशोरी तथा युवतीलाई जिस्काउन थालेको गुनासो गरिएको छ । निर्मला मृत भेटिएको क्षेत्रमा पर्ने भगतपुर ब्यारेक–उल्टाखाम सडक खण्ड भएर आवतजावत गर्ने किशोरी र युवतीलाई जिस्काउन थालेको गुनासो आएको कञ्चनपुर प्रहरीले जनाएको छ ।

जिल्ला प्रहरी कार्यालयका प्रमुख प्रहरी उपरीक्षक (एसपी) श्यामसिंह चौधरीले बाटोमा हिँड्ने क्रममा प्लस टुमा अध्ययनरत युवतीलाई जिस्काएको गुनासो आएको र सो विषयमा अनुसन्धान भइरहेको जानकारी दिए । यद्यपि प्रहरीले उजुरी भने लिन नमानेको पीडित किशोरीका परिवारको भनाइ छ ।

गत साउन १२ गते कक्षा ११ मा पढ्ने एक किशोरीलाई हात समातेर तानेको तर किशोरी फूत्किएर घर पुगी आफन्तलाई सुनाएकी थिइन् । त्यसपछि परिवारले प्रहरीमा उजुरी लिएर पुगेका थिए ।

जिल्ला प्रहरी कार्यालय कञ्चनपुरका एसपी श्याम चौधरी पनि घटना बारे जानकार देखिए । तर, उजुरी नै नलिने कारण भने खुलाउन सकेको छैन ।

निर्मला हत्याको २५ दिनपछि प्रहरीले भीमदत्त नगरपालिका–२ कै दिलिपसिंह विष्टलाई समातेर अभियुक्तका रुपमा सार्वजनिक गरेको थियो । त्यसको दुई दिनपछि २६ भदौमा जिल्ला अदालतले उनको संलग्नता पुष्टि गर्ने ठोस प्रमाण नभएको र डीएनए समेत म्याच नभएको भन्दै साधारण तारेखमा रिहा गर्न आदेश दिएको थियो । त्यसपछि उनी छुटेका थिए ।