काठमाडौँ । काठमाडौँ महानगरका मेयर बालेन शाह नर्भिक अस्पताल पुगेका छन् । उनकै निर्देशनमा सोमबार सरकारी जग्गामा बनेको अस्पतालको टहरा भत्काउन २४ घण्टाको अल्टिमेटम दिएको थियो ।

यस क्रममा अस्पतालका प्रतिनिधिले टहरा भत्काउनेबारे थप समय माग गरेका थिए । यस क्रममा अस्पतालले सार्वजनिक जग्गा मिचेर संरचना बनाएको बारेमा अध्ययन गर्न महानगर र अस्पतालले प्राविधिक राखेर अध्ययन समिति बनाउने भएका छन् ।

अस्पतालका प्रतिनिधिले समय माग गरेपछि मेयर शाहले महानगरको इञ्जिनियर आएर अध्ययन गर्न र दुई पक्षका प्रतिनिधि राखेर समिति गठन गर्ने भएको हो ।

यस्तै, मेयर शाहले अस्पतालले मन्त्रिपरिषद्बाट नै जग्गा भाडा लिएर नक्सा पास गरी भवन बनाए आफूले केही नगर्ने बताएका थिए । ‘क्याबिनेटबाटै जग्गा लिजमा लिनुहुन्छ भने हाम्रो कुरा भएन, तर अहिले यो जग्गा महानगरपालिकाको भएकाले महानगरले नै हेर्ने हो,’ उनले भने ।

नर्भिक अस्पतालले लिजमा लिएको एक रोपनी ८ आना जग्गाको पश्चिमतर्फ सम्झौताविपरीत र नक्सा पास नगरी घर टहरा बनाएको महानगरको भनाइ छ ।