झापा । जिल्लाको गौरादह नगरपालिका ७ ग्वालडुब्बाबाट सशस्त्र प्रहरीले करिब ९४ लाख रुपैयाँ बराबरको अवैध सामान नियन्त्रणमा लिएको छ । बुधबार राति सशस्त्र प्रहरीले विभिन्न किसिमका सामान बोकेको ट्रकसहित एक जनालाई नियन्त्रणमा लिएको हो ।

सोही जिल्लाको बिर्तामोड नगरपालिका ७ बस्ने ४४ वर्षीय धनिलाल राजबंशीलाई प्रहरी बल नेपाल नम्बर २ गण झापा र सुरक्षा वेश बैगुनधुराले पक्राउ गरेको हो । ग्वालडुब्बाबाट काठमाडौँतर्फ आउँदै गरेको ना ७ ख २१९६ नम्बरको ट्रकमा राखेर ल्याउँदै गरेको ९ सय ९० के.जी. रेडिमेड कपाल, लत्ताकपडा, स्टेशनरी, किराना, इलेक्ट्रिकल तथा फर्निचरका सामानसहित राजबंशी पक्राउ परेका हुन् ।

बरामद सामानको मूल्य ९४ लाख ४८ हजार रुपैयाँ रहेको सशस्त्र प्रहरीले जनाएको छ । ट्रकसहित राजबंशीलाई आवश्यक कारबाहीका लागि राजश्व अनुसन्धान कार्यालय इटहरीमा बुझाइएको छ ।