काठमाडौं । प्रधानमन्त्री शेरवहादुर देउवा र माओवादी केन्द्रका अध्यक्ष प्रचण्डवीच बालुवाटारमा भेटवार्ता भएको छ । सत्तासहयात्री यी दुई दलका शीर्ष नेताका वीचमा आगामी चुनावमा समेत तालमेल गरेरै जाने निर्णय भईसकेको सन्दर्भमा भेटवार्ता हुनु स्वभाविक हो ।

तर अन्य दिनको भेटघाट भन्दा शुक्रवार कांग्रेस सभापति समेत रहेका प्रधानमन्त्री शेरवहादुर देउवा र माओवादी केन्द्रका अध्यक्ष प्रचण्ड वीचको भेटवार्ता अर्थपूर्ण मानिएको छ । कारण हो – अन्य दिनको भन्दा शुक्रवारको भेटवार्ता करिव एक घण्टा बढी वान अन वान थियो ।

प्रधानमन्त्री शेरवहादुर देउवालाई भेटन प्रचण्ड दिउँसो ३ बजे बालुवाटार पुगेका थिए । त्यसपछि दुई नेताका वीचमा भएको बार्ता झण्डै ढेड घण्टा चलेको थियो । देउवा र प्रचण्डले बालुवाटारमा के विषयमा छलफल गरे ? त्यसको फेहरिस्त जानकारी दुवै पक्षले दिएका छैनन ।

तर बालुवाटार स्रोतका अनुसार, आजको देउवा र प्रचण्ड वीचको भेटवार्ता गठबन्धन दलहरुका वीचको चुनावी सिट बाँडफाँटमा रहेर अलिक वढी नै केन्द्रीत रहेको थियो । सत्ता गठबन्धनमा रहेका कांग्रेस, माओवादी, एकीकृत समाजवादी, जनता समाजवादी र राष्टिय जनमोर्चाले आगामी मंसिर ४ मा तय भएको प्रतिनिधीसभा र प्रदेश सभा चुनावमा तालमेल गरेर जाने औपचारिक निर्णय गरेका छन् ।

तालमेलको निर्णयसँगै सिट बाँडफाँटको नीतिगत मोडालिटी बनाउन कांग्रेसका पूर्व महामन्त्री कृष्णप्रसाद सिटौलाको संयोजकत्वमा ११ सदस्यीय कार्यादल बनाएका छन् । कार्यदलको दोस्रो बैठक बिहिबार बसेको थियो ।

कार्यादल बैठकले गठबन्धन दलहरुका वीचमा सिट बाँडफँट गर्दा मूलतः ०७४ को निर्वाचनलाई आधार बनाउने भन्ने समझदारी बनेको छ तर सबै पार्टीका सिनियर नेताहरूको व्यवस्थापनलाई ध्यान दिएर अलिअलि हेरफेर गर्ने, ०७९ को स्थानीय निर्वाचनलाई पनि आधार बनाउने र संघमा नमिलेको कुरा प्रदेशमा मिलाउने भन्ने प्रारम्भिक छलफल कार्यादलमा अघि बढेको छ ।

कार्यादल बैठकमा ०७४ मा निर्वाचन हारे पनि शीर्ष नेतालाई व्यवस्थापन गर्नुपर्ने र त्यस्ता शीर्ष नेता व्यवस्थापनको विषयमा समेत आ–आफ्नो पार्टीमा छलफल गरेर साउन ३० मा अर्काे बैठक बस्ने समझदारी दलहरुको वीचमा भएको छ । यस्तो छलफल कार्यादल तहमा भईरहेकै बेला प्रधानमन्त्री देउवा र माओवादी केन्द्रका अध्यक्ष प्रचण्डका वीचमा बालुवाटारमा लामो कुराकानी भएको हो ।

कुराकानीका क्रममा मुख्यत शीर्ष नेताहरुका विषयमा को कहाँबाट चुनाव लड्ने र उनीहरुको ब्यवस्थापन कसरी गर्न सकिन्छ भन्नेमा नै रहेर मुख्य छलफल भएको बालुवाटार स्रोतको भनाई छ ।

कार्यादलमा ०७४ को प्रतिनिधिसभा निर्वाचनलाई आधार बनाउँदा प्रत्यक्षमा जसले जितेको छ, त्यही पार्टीले उक्त निर्वाचन क्षेत्र पाउने सैद्धान्तिक आधार बनाइएको छ । यसलाई आधार बनाउँदा गठबन्धनका शीर्ष नेताहरूको निर्वाचन क्षेत्र व्यवस्थापन गर्नुपर्ने अवस्था गठबन्धनका दलहरुलाई आएको छ ।

सोहीकारण पनि यसमा प्रधानमन्त्री देउवा र माओवादी केन्द्रका अध्यक्ष प्रचण्डका वीचमा नै मुख्य समझदारी नबेनसम्म कार्यादल तहले समझदारी जुटाउन सक्ने अवस्था पनि छैन । त्यसमाथी गठबन्धनमा मधेसको अर्काे दल लोकतान्त्रिक समाजवादी पार्टी (लोसपा) र बाबुराम भटटराई नेतृत्वको नेपाल समाजवादी पार्टी (नेसपा)को सहभागिता हुने नहुने ? गर्दा कसरी गर्ने भन्नेमा पनि प्रचण्ड र देउवाका वीचमा छलफल भएको छ ।

नेसपाका अध्यक्ष डा बाबुराम भटटराईले शुक्रवार बिहान पनि प्रचण्डसँग प्रचण्ड निवास खुमलटार नै पुगेर भेटवार्ता गरेका थिए ।