काठमाडौं । सशस्त्र प्रहरीले नवलपरासीको रामग्राम नगरपालिका–१८ स्थित सीमा इलाकाबाट अवैध रुपमा भारतबाट नेपालतर्फ ल्याउँदै गरेको करीब १२ लाख ९० हजार रुपैयाँ बराबरको ३० बोरा चिनीसहित बोलेरो पिकअपलाई नियन्त्रणमा लिएको छ । सशस्त्र प्रहरी बल नेपाल,  पश्चिम नवलपरासीबाट खटिएको टोलीले ३१ साउनमा चिनीसहित गाडी नियन्त्रण गरेको हो । 

यसैगरी, सशस्त्र प्रहरी बल नेपाल बिओपी भुजहवाले सरावल गाँउपालिका–७ बाट करिब ५६ हजार रुपैयाँ बराबरको अवैध लत्ताकपडा बरामद गरेको छ । प्रतापपुर गाँउपालिका–५ बाट २१ साउनमा पनि सशस्त्र प्रहरीले तीन लाख ४४ हजार रुपैयाँ बराबरको नम्बर प्लेट नभएको एउटा ट्रयाक्टर, ट्रली र त्यसमा रहेको अवैध कवाडी सामान नियन्त्रणमा लिएको थियो । 

बरामद सामान आवश्यक कारवाहीको लागि महेशपुर भन्सार कार्यालय पश्चिम नवलपरासीमा बुझाएको छ । राजश्व अनुसन्धान कार्यालय बुटवल रुपन्देही र सशस्त्र प्रहरी बल नेपालको संयुक्त टोलीले २२ साउनमा प्रतापपुर गाँउपालिका–५ बाट बिल बिजक नभएको पाँच बोरा लत्ताकपडासहित एउटा सवारी साधन नियन्त्रणमा लिएको थियो । 

यूपी ५३ एम १८०० नम्बरको अल्टो कारमा राखेर ल्याउँदै गरेको उक्त लत्ताकपडाको बिल बिजक नभएको फेला परेपछि उक्त लत्तापकडा कारसहित आवश्यक कारवाहीको लागि राजश्व अनुसन्धान कार्यालय बुटवलमा बुझाइएको छ ।