काठमाडौं । बञ्चरेडाँडामा फोहोर विसर्जनको अवरोध हटेको छ । सत्तारुढ दलका स्थानीय नेता नेतृत्वको आन्दोलनको अवरोध हट्दा फोहोर विसर्जनमा सहज भएको छ ।
स्यानिटरी ल्याण्डफिल साइटका सहायक इन्जिनियर सरकारदीप श्रेष्ठले आज बिहानै १६२ ट्रक फोहोर बञ्चरेडाँडामा विसर्जन भएको बताए । उनलेभने “आज स्थानीयको अवरोध छैन । बिहानैदेखि फोहोरका ट्रक अनलोड भइरहेका छन् ।”

काठमाडौं उपत्यकाको फोहोर उठ्न कम्तीमा एक साता लाग्ने श्रेष्ठले बताए । उनलेभने, पुनः स्थानीयले अवरोध नगरे एकसाता भित्रै सबै फोहोर उठिसक्छ । काठमाडौं उपत्यकाका सडक, नदी, खोला किनारामा थुप्रिएको फोहोर सकिएपछि घरभित्रको फोहोर उठाइनेछ । ”

सत्तारूढ तीन राजनीतिक दलका स्थानीय नेताको नेतृत्वमा उपत्यकाको फोहोर सधैँका लागि बन्द गर्ने घोषणासँगै आन्दोलन चर्किएको थियो । अवरोधकैबीच बिहीबार २८४ टिपर फोहोर विसर्जन गरिएको थियो ।