काठमाडौं । नेकपा एकीकृत समाजवादीले बिहीबार पार्टी पुनर्गठन दिवस मनाउने भएको छ । गत वर्ष नेकपा एमालेबाट विभाजन भई माधव नेपालको नेतृत्वमा भदौ २ गते निर्वाचन आयोगमा दल दर्ताको लागि निवेदन दिएकोमा भदौ ९ गते पार्टीले दर्ता प्रमाणपत्र पाएको थियो । अयोगबाट पार्टी दर्ता प्रमाणपत्र पाएको दिन अर्थात भदौ ९ गतेलाई पार्टी पुनर्गठन दिवसको रुपमा मनाउन लागेको हो ।

एकीकृत समाजवादीका प्रवक्ता जगन्नाथ खतिवडाले बिहीबार(आज) दिउँसो १ बजे बानेश्वरस्थित अर्पण ब्यांक्वेटमा पुनर्गठन दिवस मनाउन लागिएको जानकारी दिए । उनले आफूहरूको पार्टी पुनर्गठन पश्चात पहिलो परिणाम प्रतिगमनकारी एमालेको झुण्डलाई सत्ताबाट झारेको र लोकतान्त्रिक शक्तिलाई एक ठाउँमा उभ्याएर संविधान जोगाएको बताए ।

उनले पार्टीले हालसम्म पाँच लाख सदस्यता वितरण गरिसकेको बताए । दुई लाखभन्दा बढी सदस्य पार्टीका विभिन्न कमिटीमा आवद्ध भइसकेको पनि उनले जानकारी दिए । त्यस्तै, पार्टीको निर्वाचन चिन्ह कलमको व्यापक प्रचार प्रसार भइसकेको उनले बताए ।