काठमाडौँ । नेपाली कांग्रेसले संघ र प्रदेशसभामा समानुपातिकतर्फ निर्वाचितहरूलाई पुनः सिफारिस नगर्न मातहतका संरचनालाई परिपत्र गरेको छ । पार्टीले २०७४ सालको निर्वाचनमा समानुपातिकतर्फ निर्वाचित भएकाहरूलाई पुनः सिफारिस नगर्न परिपत्र गरेको हो ।

महामन्त्री गगन थापाले पार्टीका चार तहलाई गरेको परिपत्रमा अघिल्लोपटक समानुपातिकमा चयन भइसकेका नामलाई नदोहोर्‍याउन निर्देशन गरेका हुन् ।

महामन्त्री थापाले सबै प्रदेश कार्य समिति, जिल्ला, प्रतिनिधिसभा र क्षेत्रीय समितिलाई परिपत्र गरेका हुन् ।

यस्तै, उनले प्रत्यक्षतर्फ बढीमा तीन जना र समानुपातिकतर्फ समावेशी सिद्धान्तलाई एक महिलासहित बढीमा दुई जनाको नाम पठाउनसमेत परिपत्र गरेका छन् । नाम सिफारिस गर्दा सहमतिमा हुन नसके बहुमतको आधारमा निर्णय गर्न निर्देशन गरेका छन् ।

तालमेल गर्दा अन्य दलहरूलाई छुट्याइएको स्थानमा कांग्रेसले प्रतिस्पर्धा नगर्नेसमेत पत्रमा स्पष्ट पारिएको छ ।