काठमाडौँ । सुर्खेतको वीरेन्द्रनगरबाट एक जना नक्कली डाक्टर पक्राउ परेका छन् । पक्राउ पर्नेमा जाजरकोटको शिवालय गाउँपालिका १ का २२ वर्षीय डिल बहादुर महतारा हुन् ।

जिल्ला प्रहरी कार्यालय सुर्खेतका डीएसपी एवं सूचना अधिकारी सुरज कार्कीका अनुसार उनी वीरेन्द्रनगर नगरपालिका ६ स्थित समाज डेण्डल केयर क्लिनिकका सञ्चालक हुन् ।

वीरेन्द्रनगरकै एक महिला दाँत दुख्ने समस्या लिएर उनको क्लिनिकमा गएकी थिइन् । महताराले दुख्ने दाँत निकाल्नु पर्ने सुझावअनुसार उनी राजी भइन ।

तर, महताराले दुख्ने दाँतसहित अर्को दाँत निकालिदिएका थिए । ती महिलाले नक्कली डाक्टर भएको आशांकासहित प्रहरीमा उजुरी गरेपछि प्रहरीले उनलाई पक्राउ गरेको हो ।

महतारालाई पक्राउ गरी अनुसन्धान हुँदा उनले आफू चिकित्सक नभएको स्वीकारेका छन् । उनीमाथि इलाजसम्बन्धी कसुरमा मुद्दा चलाउने प्रहरीले जनाएको छ ।