काठमाडौं । जर्मनीका विभिन्न अस्पतालमा कार्यरत विशेषज्ञ चिकित्सकको एक टोलीले मंगलबार थापाथलीस्थित नर्भिक इन्टरनेशनल अस्पतालको अवलोकन भ्रमण गरेको छ ।

बिदा मनाउन नेपाल आएका जर्मनीका ६० विभिन्न विशेषज्ञ चिकित्सकले नर्भिक इन्टरनेशनल अस्पतालको अवलोकन गरेका हुन् । जर्मनीका चिकित्सकको टोलीलाई नर्भिक अस्पतालका प्रमुख कार्यकारी अधिकृत अजय कुमार मिश्रले खादा लगाएर स्वागत गरेका थिए ।

नर्भिकको व्यवस्थापन टोलीले जर्मनी चिकित्सकलाई अस्पतालले प्रवाह गर्दै आएको आकस्मिकदेखि सघन उपचारसम्मका सेवाको विषयमा स्थलगत अवलोकन गराई जानकारी दिएको थियो ।

सो क्रममा नर्भिक अस्पतालको इमेरजेन्सी विभागका इञ्चार्ज ओमर प्रधानले अस्पतालले आकस्मिक हवाई उद्धार सेवा सञ्चालन गरिरहेको र काठमाडौँस्थित अन्तराष्ट्रिय विमानस्थलबाट निकै छोटो समयमै अस्पतालसम्म बिरामीलाई ल्याएर आकस्मिक सेवा दिने व्यवस्थापन मिलाइएको लगायतका विषयमा जानकारी दिएका थिए ।

नर्भिकका अधिकारीले अस्पतालले अन्तर्राष्ट्रिय क्षेत्रका बिरामीको उपचार सेवामा पुर्याउँदै आएको योगदान, दिँदै आएको सेवालगायत विषयमा समेत टोलीलाई जानकारी गराएका थिए ।

टोलीमा सहभागी जर्मन चिकित्सकले नेपालमा समेत नर्भिक इन्टरनेशनल अस्पतालजस्तो आधुनिक अस्पताल रहेकोमा खुशी व्यक्त गर्दै नामजस्तै अस्पतालले प्रवाह गर्ने सेवा अन्तर्राष्ट्रिय स्तरकै रहेको पाइएको प्रतिक्रिया दिएका थिए ।