सिड्नी । ट्वान्टी–२० विश्वकप सुपर–१२ ग्रुप–२ मा दक्षिण अफ्रिकाले बिहीबार १ सय ४ रनको शानदार जित निकालेको छ । जिम्बावेविरुद्धको खेल वर्षाले बिथोलिएपछि दक्षिण अफ्रिकालाई नेट रन रेट बढाउने यस्तो जित आवश्यक रहेको थियो । यो जितसँगै दक्षिण अफ्रिकाको दुई खेलबाट तीन अंक मिलेको छ र शीर्ष स्थानमा उक्लेको छ ।

सिड्नी क्रिकेट मैदानमा पहिले ब्याटिङ गरेको दक्षिण अफ्रिकाका लागि रिले रोसीले ब्याटबाट उत्कृष्ट प्रदर्शन गरे र ५६ बलमा १ सय ९ रन बनाए । उनले सात चौका र दुई छक्का प्रहार गरे । यसपल्टको विश्वकपको यो पहिलो शतक हो । उनले क्विन्टन डे ककसँग मिलेर दोस्रो विकेटका लागि कीर्तिमान १ सय ६८ रनको साझेदारी पनि गरे ।

डे ककले ३८ बलमा ६३ रन बनाए । जितका लागि ठूलो लक्ष्य पछ्याएको बंगलादेश १६।३ ओभरमा १ सय १ रन बनाएर अलआउट भयो । लिटन दासले बनाएको ३४ रन नै सर्वाधिक ठूलो व्यक्तिगत स्कोर रह्यो । दक्षिण अफ्रिकी बलरमध्ये एनरिच नोकिएले चार तथा ताब्रिज सम्सीले तीन विकेट लिए । यो हारपछि बंगलादेश दुई अंकबाट दुई अंकमै सीमित रह्यो ।