काठमाडौँ । स्पेनमा आइतबार बिहान एक विवाह पार्टीका सदस्यका बीच झगडा भएको र उनीहरूलाई कारले ठक्कर दिँदा चार जनाको मृत्यु भएको छ भने चार जना गम्भीर घाइते भएका छन् ।

घटनामा संलग्न भएको आरोपमा तीन जनालाई हिरासतमा लिइएको राष्ट्रिय प्रहरीका प्रवक्ताले एएफपीलाई बताएका छन् । म्याड्रिडबाट करिब २५ किलोमिटर (१६ माइल) उत्तरपूर्वमा रहेको टोरेजोन डे अर्डोजमा विवाहको आयोजना गरिरहेको रेस्टुरेण्डको अगाडि बिहानै झगडा भएको थियो ।

झगडापछि एउटा कारले विवाहमा आएका पाहुनालाई ठक्कर दिएर भागेको थियो । ‘जब हामी घटनास्थलमा पुग्यौं र त्यहाँ गम्भिर चोटपटकबाट चार जनाको मृत्यु भएको पाइएको,’ म्याड्रिड आपतकालीन सेवाका प्रमुख कार्लोस पोलोले बताएका छन् ।

घाइते अन्य चारजनालाई उपचारका लागि अस्पताल लगिएको उनले बताए । आक्रमण गरेको आशंका गरिएको गाडी दुर्घटना स्थलबाट ५० किलोमिटर टाढा भेटिएको र त्यसमा सवार तीन जनालाई पक्राउ गरिएको प्रहरीले जनाएको छ ।

त्यसैगरी प्रहरीले चौथो संदिग्धको खोजी भइरहेको बताएको छ ।