काठमाडौँ । अर्थमन्त्री जनार्दन शर्माले ऊर्जाको खपत बढाउन सके आर्थिक विकास गर्न सकिने बताएका छन् । आज आयोजित फिन इलेक्ट्रो टेक २०२२ प्रदर्शनीको उद्घाटन कार्यक्रममा बोल्दै उनले मुलुकभित्रै विद्युतको खपत बढाउनु पर्ने र यसले व्यापार घाटा कम गर्ने बताएका हुन् ।

मन्त्री शर्माले पछिल्लो समय कोरोना महामारी र रसिया–युक्रेन युद्धका कारण लगानीमाथिको गुणात्मक प्रतिफल पाउन नसकिएको बताए । उनले विद्युत् बिक्री गर्नेभन्दा पनि खपतमा जोड दिनु पर्ने उल्लेख गरे ।

“विद्युत् बेच्नु पर्दैन अब विद्युत् बेच्ने जमाना गए, स्वदेशमै विद्युत्को खपत बढाउनु पर्छ”, उनले भने ।

कार्यक्रममा बोल्दै नेपाल विद्युत् प्राधिकरणका कार्यकारी निर्देशक कुलमान घिसिङले आगामी दिनमा विद्युत् खपत बढ्दै जाँदा विद्युतसम्बन्धी सामग्रीको बजार पनि बढ्ने बताए ।

भोलिका दिनमा १५ हजार मेगावाट विद्युत् खपत गर्न सकियो भने विद्युतीय सामग्रीसम्बन्धित बजारको पनि सुनिश्चितता हुने उनको भनाइ छ ।

“बर्खायाममा विद्युत् निर्यात हुनु हाम्रो सफलता होइन, विद्युत् खपतबाटै समृद्धि हुन्छ, तर खपत नभएको विद्युत् खेर फाल्नुभन्दा निर्यात गर्नुपर्छ”, उनले भने ।