काठमाडौं । नेपाल चिकित्सक संघको नयाँ नेतृत्वका लागि आज उमेदवारी दर्ता भएको छ । आज विभिन्न पदमा ४१ जनाको उमेदवारी दर्ता गराएको प्रमुख निर्वाचन अधिकृत डा. धनबहादुर रानामगरले जानकारी दिए ।

उनका अनुसार अध्यक्षमा डा. सन्तोष पौडेल, डा. शिवजीविक्रम सिलवाल र डा. अनिलविक्रम कार्की तथा महासचिवमा डा.सञ्जीव तिवारी, डा.रक्षा श्रेष्ठ र डा. अमृत भुसालको उमेदवारी परेको छ ।

एक अध्यक्ष, एक वरिष्ठ उपाध्यक्ष, प्रत्येक प्रदेशबाट एक–एकजनाको दरले सातजना उपाध्यक्ष, महासचिव एक, कोषाध्यक्ष एक, सहसचिव एक, सहकोषाध्यक्ष एक र छजना सदस्य गरी १९ जनाको पदाधिकारीको निर्वाचन हुँदै छ । त्यसैगरी संघ परिषद् सदस्य ६० जनाको समेत निर्वाचन हुँदै छ ।

उनका अनुसार वरिष्ठ उपाध्यक्ष, लुम्बिनी र कर्णाली प्रदेश उपाध्यक्ष, सहसचिव र सहकोषाध्यक्षमा एकजना मात्र उमेदवारको मनोनयन परेको छ ।
उपत्यकाबाहिर माघ ६ र ७ गते र काठमाडौं उपत्यकामा माघ १९, २० र २१ गते निर्वाचन हुँदै छ । चिकित्सकको समय व्यवस्थापन गर्नका लागि उपत्यकाबाहिर दुई दिन र उपत्यकामा तीन दिन निर्वाचनको मिति तय गरिएको उनले बताए ।

निर्वाचनमा मतदाता १२ हजार ८३४ जना रहेका थिए । उपत्यकाबाहिर मतपत्र र उपत्यकामा विद्युतीय मतदान गर्ने तयारी भइरहेको प्रमुख निर्वाचन अधिकृत डा। रानामगरले जानकारी दिए ।