आइतबार, मंसिर १४, २०८२

साम करन बने आईपीएल इतिहासकै महँगो खेलाडी

मेरोन्यूज २०७९ पुष ९ गते ८:५१

काठमाडौं । इङ्ल्यान्डका युवा अलराउन्डर साम करन इन्डियन प्रिमियर लिग (आईपीएल) अक्सनको इतिहासकै सबैभन्दा महँगो खेलाडीका रूपमा अनुबन्धित भएका छन् । शुक्रबार भएको अक्सनमा २४ वर्षीय करनलाई भित्र्याउन पन्जाब किङ्सले कीर्तिमानी १८ करोड ५० लाख भारतीय रुपैयाँ खर्चियो ।
यसअघि आईपीएल अक्सनमा दक्षिण अफ्रिकाका क्रिस मोरिस सबैभन्दा महँगोमा बिक्री हुने खेलाडी थिए । मोरिसलाई २०२१ मा राजस्थान रोयल्सले १६ करोड २५ लाखमा भित्र्याएको थियो ।

यसैगरी, आईपीएल इतिहासमा दोस्रो सर्वाधिक महँगो खेलाडी बनेका अस्ट्रेलियाका क्यामरून ग्रिन १७ करोड ५० लाख रुपैयाँमा मुम्बई इन्डियन्समा पुगेका छन् ।

शुक्रबार सम्पन्न अक्सनको तेस्रो महँगा खेलाडी बनेका इङ्ल्यान्डकै अलराउन्डर बेन स्टोक्सलाई चेन्नई सुपर किङ्सले १६ करोड २५ लाख भारतीय रुपैयाँमा भित्र्याएको छ ।

सूचीको चौथो स्थानमा रहेका वेस्टइन्डिजका निकोलस पुरनलाई लखनउ सुपर जायन्ट्सले १६ करोड भारतीय रुपैयाँमा अनुबन्ध गरेको छ ।

सुचीको पाँचौ स्थानमा रहेका इङ्ल्यान्डकै ह्यारी ब्रुक १३ करोड २५ लाख भारतीय रुपैयाँमा सनराइजर्स हैदराबादमा अनुबन्धित भएका छन् ।

अक्सनमा कुल ८० खेलाडी लिलाम भएका छन् । जसका लागि आईपीएलका १० फ्रेन्चाइज क्लबहरूले एक अर्ब ६७ करोड भारतीय रुपैयाँ खर्चिए ।

प्रतिक्रिया