काठमाडौँ । सदरमुकाम दुनै–ल्यासिक्याप सडक खण्डको काम सम्झौता भएको दश महिना बितिसक्दा सुरु हुन सकेको छैन ।

भेरी करिडोरअन्तर्गत पर्ने सडक खण्ड निर्माणका लागि ०७८ साल चैतमा सूर्या श्रेया शान्तिदेवी जेभी निर्माण कम्पनीसँग सम्झौता भएको थियो ।

नेपाल–चीनको सीमावर्ती क्षेत्र मोरिम्ला नेपाल हुँदै भारतको रुपैडिया जोड्ने महत्वपूर्ण रणनीतिक तथा व्यापारिक सडक खण्डअन्तर्गत पर्ने यस खण्डको काम गराउन कार्यालयले बारम्बार ताकेता गर्दै आएको छ । तर, निर्माण कम्पनीले अझै काम सुरु नगरेको सडक डिभिजिन कार्यालय चौहरजहारीका इञ्जिनियर दिलीप यादवले बताए ।

‘दुईपटक ठेक्का किन नतोड्ने व्यहोरासहितको ताकेता पत्र काटिसकेका छौँ, एउटा पत्र गत मंगलबार सात दिनको समयसीमा राखेर काटिएको छ, यदि सात दिनभित्र सम्पर्कमा नआएर ठेक्का तोड्ने प्रक्रियामा जान्छौँ,’ इञ्जिनियर यादवले भने ।

‘सम्झौता भएलगत्तै काम सुरु गर्ने भनेर ५५ लाख पेश्की रकम रकमसमेत गइसकेको छ, ठेकेदारका कारण काममा ढिलासुस्ती भएको हो,’ उनले थपे ।

आयोजनामा कूल लागत १३ करोड ४१ लाख खर्च हुनेछ । सडक खण्ड दुनै–ल्यासिक्याप सडक खण्ड काइके, डोल्पोबुद्ध गाउँपालिका हुँदै नेपाल–चीन सिमामा पर्ने मोरिम्ला नाका पुग्नेछ ।