काठमाडौँ । गृह मन्त्रालयले कार्यविधिको व्यवस्थाभन्दा धेरै सुरक्षाकर्मी राखेका विशिष्ठ व्यक्तिहरूसँग सेवा सुविधा फिर्ता गर्न माग गरेको छ ।

सोमबार नयाँ गृहमन्त्रीको पद बहाली भएसँगै ‘विशिष्ट व्यक्तिहरूको सुरक्षा व्यवस्थापन कार्यविधि, २०७७ को’ व्यवस्थाभन्दा बढी सुरक्षाकर्मी भए फिर्ता गर्न सूचना जारी गरेको हो ।

‘विशिष्ट व्यक्तिहरूको सुरक्षा र सम्मानलाई ध्यान दिँदै नेपाल सरकारबाट ‘विशिष्ट व्यक्तिहरूको सुरक्षा व्यवस्थापन कार्यविधि, २०७७ जारी भई हाल कार्यान्वयनमा रहेको छ, उक्त कार्यविधिमा तोकिएअनुसारका बहालवाला तथा पूर्व कर्मचारी–सुरक्षाकर्मीले व्यक्तिगत सुरक्षाकर्मीको सुविधा पाउने व्यवस्था रहेको छ,’ सूचनामा भनिएको छ, ‘कार्यविधिमा व्यवस्था गरिएभन्दा विपरीत सेवा सुविधा लगायत व्यक्तिगत सुरक्षाकर्मी, सहयोगी राखेको भए ४८ घण्टाभित्र फिर्ता गर्न मातहत सुरक्षा निकायलाई निर्देशन गरी सकिएको हुँदा उक्त कार्यविधि पालना गर्न सहयोग गरदिन सबैमा अनुरोध छ ।’