काठमाडौँ । एक बालकको हत्या आरोपमा दुई जना पक्राउ परेका छन् । नौ वर्षीय बालकको हत्या गरी नदीमा शव फालेको आरोपमा उनीहरूलाई पक्राउ गरेको हो ।

जिल्ला प्रहरी कार्यालय रौतहटका अनुसार माधवनारायण नगरपालिका ८ पिपरा रजवाडाका नौ वर्षीय बालक आशनारायण प्रसाद कुशवाहाको हत्या गरेको आरोपमा उनकै काका जयराम महतो कोइरी र सोही स्थानका सञ्जय राम पक्राउ परेका हुन् ।

दाजुभाइबीचको जग्गाको विवाद हुँदा काकाले नौ वर्षीय भतिजाको हत्या गरेको प्रहरीले जनाएको छ । मंसिर २५ गते घरबाट हराएका आशनारायणको शव पुस १ गते बागमती नदीमा फेला परेको थियो ।

पक्राउ परेका दुवै जनालाई कर्तव्य ज्यान मुद्दामा जिल्ला अदालतबाट म्याद थप गरिएको छ ।