काठमाडौं । ‘केपी ओली कप’ फुटबल प्रतियोगिता हुने भएको छ। आगामी फागुन ११ गतेदेखि १७ गतेसम्म युवा संघ नेपालको आयोजनामा फुटबल प्रतियोगिता हुन लागेको हो । प्रतियोगिता गर्न अखिल नेपाल फुटबल संघले (एन्फा) ले अनुमति दिएको छ ।

एन्फा महासचिव किरण राईले युवा संघले फुटबल प्रतियोगिता आयोजना गर्ने भनेर स्वीकृतिको लागि चिठी पठाएको र त्यो चिठी अनुरुप आफूहरूले प्रतियोगिताका लागि अनुमति दिइएको जानकारी दिए ।

युवा संघले प्रतियोगितामा ए डिभिजन क्लबका ८ वटा टिम सहभागी हुने तथा प्रतियोगिताका विजेतालाई १० लाख र उपविजेतालाई ५ लाख रुपैयाँ पुरस्कार दिइने जानकारी दिएको छ ।

प्रतियोगिताका खेलहरू सातदोबाटोस्थित एन्फा कम्प्लेक्स, च्यासल मैदान र एपिएफको खेल मैदानमा हुने छन् ।