काठमाडौं । शिक्षा, विज्ञान तथा प्रविधि मन्त्रालयले आगामी शैक्षिक सत्रबाट कक्षा १ देखि ५ कक्षासम्मका पाठ्यपुस्तक निजी क्षेत्रलाई दिने प्रक्रिया सुरु गरेको छ । पाठ्यक्रम विकास केन्द्र सानो थिमी भक्तपुरले सूचना जारी गरी पाठ्यपुस्तक छपाइ तथा वितरण गर्न इच्छुक मुद्रक तथा वितरकहरूलाई नवीकरण तथा सूचीकरण गर्न भनेको छ ।

यसअघि १ देखि ३ कक्षासम्मको पुस्तक छपाईको जिम्मा निजी क्षेत्र दिने गरिएकोमा यस वर्षबाट ५ कक्षासम्म दिन लागिएको हो ।
सूचनामा निजी मुद्रक तथा वितरकहरूले कक्षा १ देखि ५ सम्मका चार रङका पाठ्यपुस्तक र अन्य पाठ्यसामग्री छपाई गरी विक्री वितरण गर्नुपर्ने उल्लेख छ ।

यसअघि जनक शिक्षा सामग्री केन्द्रले केन्द्रले तयार पारेको प्रिन्ट रेडी कपी (पीआरसी) का आधारमा पाठ्यपुस्तक छाप्थ्यो । अब निजीले पनि त्यसैका आधारमा छाप्नु पर्ने सूचनामा उल्लेख छ ।

पाठ्यपुस्तकको अभाव हुने समस्या समाधान गर्न निजीलाई पनि पाठ्यपुस्तक छपाईको जिम्मेवारी दिन लागिएको मन्त्रालयले जनाएको छ ।

केन्द्रले कक्षा १–५ सम्म नै छपाइको जिम्मा निजी क्षेत्रलाई दिने प्रस्ताव पुनः मन्त्रालयमा पठाएको थियो । सोही आधारमा मन्त्रालयले कक्षा ५ सम्मको छपाईको जिम्मा निजीलाई दिने निर्णय गरेको हो ।