काठमाडौं । मलेसियाका गृहमन्त्री सैफुद्दिन नासुसन इस्माइलले शुक्रबार बिहान १० बजे श्रम, रोजगार तथा सामाजिक सुरक्षा मन्त्री डोलप्रसाद अर्यालसँग भेटवार्ता गर्ने समय तय भएको छ । श्रम मन्त्रालयका प्रवक्ता डण्डुराज घिमिरेले तीन दिने भ्रमणका लागि बिहीबार नेपाल आइपुगेका मलेसियाका गृहमन्त्री इस्माइलले श्रममन्त्री अर्यालसँग ज्ञण् बजे औपचारिक छलफल गर्ने कार्यक्रम तय भएको जानकारी दिए ।

मलेसियाका गृहमन्त्री सैफुद्दिनले प्रधानमन्त्री पुष्पकमल दाहाल ‘प्रचण्ड’सँग पनि छलफल गर्ने छन् । छलफल तथा भेटवार्तामा निजी क्षेत्रलाई सहभागी गराइएको छैन भने सञ्चारकर्मीलाई समाचार संकलनमा समेत अनुमति नरहेको श्रम मन्त्रालयका प्रवक्ता घिमिरेले बताए ।

विशेष विमानबाट बिहीबार साँझ त्रिभुवन अन्तर्राष्ट्रिय विमानस्थलमा अवतरण गरेका उनी ताहाचलस्थित सोल्टी होटलमा बसेका छन् ।

मलेसिया नेपालको प्रमुख श्रम गन्तव्य मुलुक हो । सैफुद्दिन कामदार आपूर्तिको महत्वपूर्ण एजेण्डासहित नेपाल आएका हुन् । नेपाल आउनु अघि उनले उच्चस्तरीय मलेसियाली अधिकारीसहित मलेसियाका विदेशी कामदार आपूर्ति गर्ने प्रमुख श्रोत मुलुक इन्डोनेशियाको भ्रमण गरी कामदार आपूर्ति सम्बन्धमा छलफल गरेका थिए ।

‘फरेन वर्कर इम्प्लोइमेन्ट रिल्याक्सेशन प्लान’ नीति लिएको मलेसियाले सेवा, औद्योगिक उत्पादन, कृषि तथा प्लान्टेसन र निर्माण क्षेत्रमा कामदारको अभाव झेलिरहेको छ । मलेसियाले तत्काल ५ लाख विदेशी कामदार लैजाने बताएको छ । उनले नेपालबाट आपूर्ति हुन सक्ने कामदारको सीप तथा संख्याका बारेमा बुझ्ने बताइएको छ ।

भ्रमण सम्पन्न गरी उनी शनिबार बंगलादेश फर्कने कार्यक्रम रहेको बताइएको छ ।