काठमाडौँ । विश्व विजेता अर्जेन्टिना ६ वर्षपछि फिफा वरियताको शीर्ष स्थानमा पुगेको छ । फिफाले आज अपडेट गरेको नयाँ वरियतामा अर्जेन्टिना शीर्ष स्थानमा पुगेको हो ।

अर्जेन्टिनाले गत डिसेम्बरमा कतारमा भएको विश्वकप उपाधि जितेको थियो । त्यसपछि अर्जेन्टिनाले केही दिनअघि मैत्रीपूर्ण खेलमा पनामालाई २–० र कुराकाओलाई ७–० गोलले पराजित गरेको थियो ।

फ्रान्स पनि एक स्थान सुधार गर्दै दोस्रो स्थानमा उक्लिएको छ । ब्राजिल तेस्रो स्थानमा पुगेको छ । पछिल्लो पटक ब्राजिल मैत्रीपूर्ण खेलमा मोरक्कोसँग २–१ ले पराजित भएको थियो ।

यस्तै, बेल्जियम चौथो, इंग्ल्याण्ड पाँचौ, नेदरल्याण्ड्स छैटौं, क्रोएसिया सातौँ, इटली आठौं, पोर्चुगल नवौँ र स्पेन दशौँ स्थानमा यथावत छन् । मोरक्को ११ औं स्थानमा छ ।

एसियाली राष्ट्रतर्फ जापान सबैभन्दा माथि २० औं स्थानमा छ भने नेपालले केही सुधार गर्दै १७४ स्थानमा उक्लिएको छ ।