काठमाडौँ । राज्यको प्रमुख सुरक्षा अंग नेपाली सेनामा पारिश्रमिक खुवाउन बजेट नभएर समस्या भएको छ । सैनिक अधिकृत र जवानलाई पारिश्रमिक उपलब्ध गराउने बजेट नभएपछि फागुन महिनाको पारिश्रमिक चैत २० गतेपछि मात्रै उपलब्ध गराइएको छ ।

बजेट उपलब्ध गराउँदा बजेट नभएपछि सैनिक कल्याणकारी कोष र शान्ति सेनासम्बन्धी कोषबाट झिकिएको जंगी अड्डा स्रोतले जानकारी दियो ।

‘कहिलेकाही त हामीले कल्याणकारी कोषको रकम उपयोग गथ्यौँ र फेरि राख्थ्यौँ,’ स्रोतले भन्यो, ‘अहिले साच्चिकै समस्या परेर कोषको रकम झिकिएको छ । पहिलो राख्ने टुंगो हुन्थ्यो । यो पटक कहिले कोषबाट झिकिएको रकम कोषमै दाखिला गर्ने हो टुंगो छैन ।’

सेनामा यति अफ्टेरो अवस्था आएको यो पहिलो घटना भएको सैनिक अधिकारीहरू बताउँछन् । बजेट नभएपछि अन्य प्रशासनिक र टेनिङका काम गर्नसमेत समस्या भइरहेको सेनाले बताएको छ ।

तर, यस विषयमा औपचारिक जानकारी लिँन खोज्दा सम्वन्धित अधिकारी सम्पर्कमा आउन चाहेनन् । ती अधिकारीले अनौपचारिक रूपमा भने, ‘मुलुक नै समस्यामा पर्ने अवस्थामा त्यस समस्याबाट सेना अछुतो रहन सक्दैन । केही समस्या अवश्य पनि देखिएको हो । तर, तपाईंले भनेजस्तो भयाभह भने होइन ।’

राज्यमा रहेको ढुकुटी रित्तिएको खबर सार्वजनिक भइरहेका बेला सेनामा पारिश्रमिक उपलब्ध गराउनै गाह्रो भएको हो ।

बिहीबार मात्रै भेटेनेरी तर्फका कर्मचारीले चार महिनादेखि पारिश्रमिक पाउन नसकेको खबर सार्वजनिक भएको थियो ।