काठमाडौं । सलमान खानको फिल्म ‘टाइगर ३’ मा शाहरुख खानको पनि अभिनय रहने भएको छ। उनीहरु लामो समयपछि फिल्म ‘टाइगर ३’मा एकसाथ काम गर्ने भएका हुन्।

यसैबीच फिल्ममा सलमान र शाहरुखको ठूलो बजेटको एक्सन सिन हुने खबर आइरहेको छ । भारतीय मिडियाका अनुसार यस सिलसिलाका लागि ३५ करोड रुपैयाँ भारुको सेट निर्माण गरिएको छ ।

स्रोतका अनुसार फिल्मका निर्माता आदित्य चोपडा यी दुई स्टारको एकसाथ उपस्थितिलाई पूर्णरुपमा सदुपयोग गर्न चाहन्छन् ।

हिन्दुस्तान टाइम्सको स्रोतले भन्यो, ‘ पठान पछि ‘टाइगर ३’ मा पहिले कहिल्यै नदेखेको कुरा देखाइँने छ । फिल्ममा हाई भोल्टेज एक्सन सिक्वेन्स बनाउने तयारी भइरहेको छ। निर्माताले यसका लागि तयारी थालिसकेका छन्।’

पठानको उत्कृष्ट सफलतापछि अब दर्शकले ‘टाइगर ३’ मा पनि धेरै नयाँ कुराहरु हेर्न पाउने भएका छन् ।

फिल्म १० नोभेम्बर २०२३ मा दीपावलीको अवसरमा रिलिज हुने बताइएको छ । फिल्ममा सलमान, शाहरुखका अलावा कट्रिना कैफ र इमरान हाश्मी पनि देखिनेछन् ।

भारतीय मिडिया रिपोर्टका अनुसार फिल्मको कुल बजेट २२५ करोड भारु हुने बताइएको छ ।