काठमाडौँ । प्रतिनिधि सभा सदस्यहरूका लागि अब इ–हाजीरीको व्यवस्था गरिएको छ । प्रतिनिधि सभा कार्यव्यवस्था समितिले यो अधिवेशनबाटै इलेक्ट्रोनिक हाजिरीको व्यवस्था गर्ने निर्णय गरेको हो ।

यसअघि सांसदहरूको हाजिरी रजिस्टरमा हुँदै आएको थियो । प्रतिनिधिसभा कार्यव्यवस्था समितिको आइतबारको बैठकले अबदेखि सांसदहरूको हाजिरी संसद्‌को वेबसाइटमार्फत सोही दिन सार्वजनिक गर्ने निर्णय गरेको सभामुख देवराज घिमिरेले जानकारी दिए ।

सांसदहरूको विद्युतीय हाजिरीको व्यवस्था नहुँदा उपस्थित र अनुपस्थित सांसदबारे जानकारी नहुने र कोरम समेत नपुग्ने समस्या देखिएपछि ई–हाजिरीको व्यवस्था गरिएको हो । विद्युतीय हाजिरीपछि कोरम नपुग्ने समस्या हट्ने सभामुख घिमिरेले बताए ।

‘ई–हाजिरीको बारेमा राष्ट्रिय सभाको सिकाइ र अनुभव पनि लिएर अझै प्रभावकारी बनाउँ,’ कार्यव्यवस्था बैठकमा सभामुखले भने, ‘सदनमा माननीयहरूको उपस्थिति कमजोर छ । सांसद तलबभत्ता खान आए भन्ने आम बुझाइ छ । यो हाम्रो लागि राम्रो होइन । सबै दल र माननीयहरूको ध्यानाकर्षण गराउँछु ।