काठमाडौं । उपप्रधानमन्त्री तथा गृहमन्त्री नारायणकाजी श्रेष्ठले नक्कली भुटानी शरणार्थी प्रकरणमा अभियोगपत्र दायर नहुँदै अनुसन्धानका कागजात बाहिरिएकोमा असन्तुष्टि व्यक्त गरेका छन् । प्रहरी महानिरीक्षक बसन्तबहादुर कुँवरलाई बुधबार बोलाएर असन्तुष्टि व्यक्त गरेका हुन् ।

नक्कली भुटानी शरणार्थी प्रकरणमा कुँवरको नामसमेत आरोपितहरूले लिइरहेको बेलामा गृहमन्त्री श्रेष्ठले महानिरीक्षक श्रेष्ठसँग छलफल गरेका हुन् ।

भेटमा गृहमन्त्री श्रेष्ठले‘‘प्रहरी मुछिएको’ विषयमा चासो राखेका थिए । अनुसन्धान प्रतिवेदनभित्रका सक्कल कागजातहरु अभियोगपत्र दायर नहुँदै सार्वजनिक कसरी भयो भन्ने प्रश्न श्रेष्ठले गरेको स्रोतले बतायो । प्रहरीले गलत गरेको भन्दै अब यस्ता काम नगर्न सचेत गराएको पनि स्रोतले बताए ।

गृहमन्त्रीसँग भेटेपछि आईजीपी कुँवरले उपत्यका प्रहरी कार्यालयका प्रमुख श्याम ज्ञवाली, काठमाडौं उपत्यका अपराध अनुसन्धान कार्यालयका प्रमुख मनोज केसीसहितका अधिकारीहरुसँग छलफल गरेका छन् । उनले पनि अनुसन्धानका कागजातहरु बाहिरिएको विषयमा असन्तुष्टि जनाएका थिए ।

आईजीपी कुँवरले नक्कली शरणार्थी प्रकरणका आरोपीहरुसँग भेटेको, पक्राउ परेकाहरुलाई यत्तिकै छोडेको, अनुसन्धानको फाइल घरमा लगेको जस्ता अपुष्ट कुराहरु सञ्चारमाध्यममा आइरहेका छन् । आईजीपी कुँवर भने आफूविरुद्ध सुनियोजित षडयन्त्र भइरहेको बताउँछन् ।