काठमाडौँ । अर्थमन्त्री प्रकाशशरण महतले बजेटमा देखिएको आशंका काम गरेर हटाउने दाबी गरेका छन् ।

‘काम गर्ने शैली परिवर्तन गरेर बजेट कार्यान्वयन गर्न सकिन्छ, विगतमा गर्न नसकेका कामलाई तुलना गरेर बजेटमा राम्रा विषय धेरै, तर उपलब्धि कम हुन्छ भन्ने शंका कामबाट निवारण गरिन्छ,’ उनले भने ।

मन्त्री महतले अनावश्यक खर्च नगर्ने बताउँदै यसपालि कार्यान्वयन हुने गरी बजेट आएको दाबी गरे । मौद्रिक नीति र वित्त नीतिको सामन्जस्यताबाट अर्थतन्त्र चलायमान गराउन सकिने उनको भनाइ थियो ।

‘राजस्व नीतिमा सुधार गरेका छौँ, त्यसमा भएका लुपहोल हटाएका छौं, यसले आगामी दिनमा राजस्व वृद्धि हुने छ,’ मन्त्री महतले भने ।

सांसदलाई विकास निर्माणका लागि दिएको रकमलाई व्यक्तिलाई दिएजस्तो व्याख्या नगर्न उनको आग्रह थियो ।