काठमाडौँ । करिब साढे चार करोड रुपैयाँ गैरकानुनी सम्पत्ति आर्जन गरेको अभियोगमा पूर्ववरिष्ठ निरीक्षक (उपसचिवसरह) शशिभूषणकुमार यादवविरुद्ध मंगलबार विशेष अदालतमा मुद्दा दायर गरेको छ ।

अख्तियार दुरुपयोग अनुसन्धान आयोगले गुणस्तर तथा नापतौल कार्यालय वीरगञ्जका पूर्ववरिष्ठ निरीक्षक यादवविरुद्ध मुद्दा दायर गरेको हो । ०७८ मंसिरमा सेवानिवृत्त भएका उनी सेवामा रहँदा विवादित हुँदै आएका थिए ।

अख्तियारले उनी सार्वजनिक सेवा प्रवेश गरेको ८ जेठ ०४६ देखि ०७९ असार मसान्तसम्मको आम्दानी र खर्च तथा लगानीको विश्लेषण गरेको थियो । उनीसँग कूल सात करोड २४ लाख ५६ हजार रुपैयाँ देखिएको आरोपपत्रमा उल्लेख छ ।

सोही अवधिमा उनको पारिश्रमिक र तलबबाट जीवन निर्वाह खर्च कटाई बचत, जग्गा बिक्री, श्रीमतीको पारिश्रमिक बचत, कृषि आयबाट बचत, घरभाडा, बुहारीको पारिश्रमिक बचत, बिमा फिर्ता, विदेश तालिम आयबाट बचत, ऋण सापटी, उपचार खर्च, सञ्चित बिदाको रकम, कर्मचारी सञ्चय कोष फिर्ता रकम, नागरिक लगानी कोष, श्रीमतीको अवकाशबाट प्राप्त रकम, निजको पेन्सन आयबाट बचत र छोराको तलब बचतसमेत गरी जम्मा दुई करोड ७७ लाख २२ हजार आय आर्जन देखिएको थियो ।

‘निजको वैध आय दुई करोड ७७ लाख २२ हजारको अनुपातमा सोही अवधिमा निजले सात करोड २४ लाख ५६ हजार खर्च तथा लगानी गरेको देखिँदा निजको कुल वैधानिक आयलाई निजले गरेको कुल व्ययसँग तुलना गर्दा निजको आयस्रोत र आर्जन गरेको सम्पत्तिबीच तादात्म्यता देखिन नआई चार करोड ४७ लाख ३४ हजारबराबर सम्पत्ति ऋणात्मक देखिई वैधानिक स्रोत पुष्टि हुन सकेन,’ आरोपपत्रमा अख्तियारले भनेको छ ।

सम्पत्ति जफत प्रयोजनका लागि अख्तियारले उनकी पत्नी रिता रानी र पुत्रद्वय अविनाश यादव र विकास यादवलाई समेत प्रतिवादी बनाएको छ ।