काठमाडौँ । जिल्ला प्रहरी कार्यालय धादिङले ज्वालामुखी गाउँपालिका ४ धौखोला–दोभारटारस्थित गंगा गुरुङले सञ्चालन गरेको खाजा पसलबाट चोरी सिकारीमा संलग्न चार जनालाई पक्राउ गरेको छ ।

मृग मारेर खाजा खाँदै गर्दा उनीहरूलाई शनिबार राति हतियारसहित पक्राउ गरेको हो । गोप्य सूचनाका आधारमा खटिएको प्रहरीले उनीहरूलाई पक्राउ गरेको हो ।

पक्राउ पर्नेमा ज्वालामुखी गाउँपालिका ४ का ६० वर्षीय पदम सिलवाल, ३० वर्षीय राजेन्द्र शाक्य, २८ वर्षीय आशिष गुरुङ र सोही पालिकाको ६ का १९ वर्षीय सुमन गुरुङ रहेका छन् ।

उनीहरूको साथबाट आलो छाला, हड्डीसहितको आलो मासु, लोड गरिएको दुई थानसहित तीन वटा भरुवा बन्दुक, एक थान खुकुरीसहित हतियार फेला परेको प्रहरीले जनाएको छ ।

पक्राउ परेकाहरूलाई जिल्ला अदालतबाट हातहतियार खरखरजना मुद्दामा सात दिन म्याद थप गरी अनुसन्धान गरिरहेको छ । उनीहरूविरुद्ध वन्यजन्तु शिकारसम्बन्धी कसूरमा डिभिजन वन कार्यालय धादिङबाट थप अनुसन्धान हुने भएको छ ।