काठमाडौँ । काठमाडौँ महानगरका मेयर बालेन शाहले काठमाडौँका फिल्म हलहरूमा भारतीय चलचित्र प्रदर्शन गर्न नदिने दोहोर्‍याएका छन् ।

उच्च अदालतले दिएको आदेश नमान्ने भन्दै मेयर शाहले अदालत र सरकार भारतको गुलाममा भएको संकेत गरेका छन् । उनले आफ्नो सामाजिक सञ्जालमा भनेका छन्, ‘फिल्म लेखकले नेपाल भारतको अधिनमा थियो भनिसकेपछि उनीहरूको नियत थाहा हुन्छ, यो कुरालाई नेपाल सरकारले स्टण्ट भन्नु र अदालतले फिल्म चल्न दिनु भनेको नेपाल भारतको अधिनमा थियो, अदालत र सरकार भारतको गुलाम भएको बुजिन्छ ।’

यस्तै, मेयर शाहले देशको सार्वभौमिकता र स्वाधिनतामा आफूले कुनै कानुन र अदालतलाई मान्नेवाला नभएको बताए । ‘जहाँ सवाल देशको सार्वभौमिकता र स्वाधिनताको आउँछ म कुनै कानुन र अदालतलाई मान्नेवाला छैन,’ उनले भनेका छन् ।

उच्च अदालत पाटनले बिहीबार भारतीय चलचित्रलगायत सेन्सर बोर्डले स्वीकृत गरेका चलचित्रको प्रदर्शन नरोक्न अल्पकालीन अन्तरिम आदेश दिएको थियो ।

अदालतले आदेश दिएसँगै मेयर शाहले भारतीय फिल्मको प्रदर्शन हुन नदिने बरु जुनसुकै सजाय भोग्न तयार हुने बताए । मेयरको निर्णयविरुद्ध चलचित्र संघ अदालत गएको थियो ।