काठमाडौँ । अख्तियार दुरुपयोग अनुसन्धान आयोगको टोलीले पशुपतिनाथ मन्दिरको जलहरीमा प्रयोग भएको सुनको तौल र गुणस्तर जाँच्ने भएको छ ।

आयोगको टोली जलहरीको अनुगमनमा जाने भएसँगै पशुपतिनाथ मन्दिर खाली गराइएको छ । मन्दिर क्षेत्रमा पूजाआजा गर्न पुगेका भक्तजनलाई बाहिर निकालेर पशुपतिका सबै ढोका बन्द गरी खाली गराइएको हो ।

जलहरी राख्दा भ्रष्टाचार भएको उजुरी परेपछि आयोगको टोली पशुपतिनाथ मन्दिर जान लागेको हो ।

पशुपतिनाथमा सुनको जलहरीबारे प्रतिनिधिसभा बैठकमा कुरा उठेको थियो । नेकपा माओवादी केन्द्रका एक सांसदले तत्कालीन केपी शर्मा ओली सरकारको नेतृत्वमा सुनको जलहरी लगाउँदा ११ किलो सुन घोटला भएको भन्दै प्रश्न उठाएका थिए ।

तर, आफ्नो पार्टी अध्यक्ष केपी ओलीमाथि गम्भीर आरोप लगाएको भन्दै नेकपा एमालेले संसदबाट उक्त रेकर्ड हटाएर प्रधानमन्त्रीले माफी माग्नु पर्ने अडान राख्दै संसद अवरोध गर्दै आएको थियो ।

एमालेको माग बमोजिम सभामुख देवराज घिमिरेले सुनको जलहरीबारे संसदमा ओलीमाथि उठेको प्रश्नको रेकर्ड हटाउन निर्देशन दिएका थिए । यस्तै, प्रधानमन्त्री पुष्पकमल दाहाल ‘प्रचण्ड’ उक्त विषय नभएको बताएका थिए ।