काठमाडौं । निर्देशक नाग अश्विन अभिनेता प्रभास स्टारर फिल्म ‘प्रोजेक्ट के’ को निर्माणमा व्यस्त छन् । यसैबीच फिल्मको कथालाई लिएर निर्माण पक्षले केहि खुलासा गरेकाे छ। रिलिज मिति नजिकिँदै गर्दा फिल्मको बारेमा नयाँ खुलासा भइरहेका हुन् ।

भारतीय सञ्चारमाध्यमका अनुसार ‘प्रोजेक्ट के’ मा प्रभासको चरित्र भगवान विष्णुबाट प्रेरित छ । निर्माण पक्षले भनेको छ, ‘प्रभासको क्यारेक्टर भगवान विष्णुको हो । उनले प्रविधिको प्रयोग गरेर आधुनिक खलनायकहरूसँग लडेकाे कथा यस फिल्ममा देखाइने छ।’ फिल्ममा खलनायकको भूमिका कमल हसनले निभाउनेछन् ।

वैजयन्ती मुभिजका सी. अश्वानी दत्तद्वारा निर्मित याे फिल्म ५०० करोडभन्दा बढीको बजेटमा बनेको हाे । याे भारतीय सिनेमामा बनेको सबैभन्दा महँगो फिल्म हो।

‘प्रोजेक्ट के’ तेलुगु र हिन्दीमा एकैसाथ सुटिङ भइरहेको छ । फिल्ममा प्रभास, अमिताभ बच्चन, कमल हसन, दीपिका पादुकोण र दिशा पटानी मुख्य भूमिकामा छन् । फिल्म तेलुगु, हिन्दी, तमिल, मलयालम र कन्नड भाषाहरूमा जनवरी १२, २०२४ मा रिलिज हुने बताइएको छ। यद्यपि यसको आधिकारिक पुष्टि भने भइसकेको छैन ।